Ginpataas sang United States Department of Agriculture (USDA) sa 46,000 metric tons ang forecast sini sa produksyon sang gatas sa Pilipinas subong nga 2026, mas mataas sang 24% gikan sa nauna nga rekord nga 37,000 MT.
Suno sa USDA, ang mga programa sang gobyerno nakabulig sa pagpataas sang produksyon, lakip na ang pag-import sang masobra 1,400 ka dairy cattle halin sa Australia agud mapasangkad ang numero sang mga domestic animals nga nagahatag sang gatas.
Apang, ang produksyon kada sapat nagapabilin nga manubo bangud sang mataas nga gasto, kakulang sang imprastraktura kag indi nagakaigo nga pagpakaon kag pag-atipan.
Samtang, ginalauman nga magalab-ot sa 212,000 MT ang konsumo sang gatas sa pungsod sini nga tuig, rason kon ngaa magalab-ot sa ginabulubanta 166,000 MT ang importasyon agud masabat ang local demand.
