Posible nga indi maglab-ot sa 30,000 metric tons ang produksyon sang kape sa Pilipinas subong nga tuig bangud sa epekto sang El Niño kag pagtaas sang gasto sa produksyon suno sa Philippine Coffee Board Inc. (PCBI).
Suno kay PCBI Chairperson Pacita Juan, bangud sa pagtaas sang temperatura, kinahanglan nga sayluhon sa mas mataas nga lugar ang pagtanom sang pila ka sahi sang kape nga sadto nagatubo sa manubo nga lugar.
Para mabuhinan ang gasto, gina-engganyo sang PCBI ang mga mangunguma nga maggamit sang organic fertilizers kag iban pa nga farm inputs sa baylo nga magsalig sa fertilizers halin sa petrolyo nga nangin mahal sang nagligad nga mga binulan.
Base sa data sang Philippine Statistics Authority, ang produksyon sang coffee beans sa pungsod naglab-ot sa 35,650 metric tons sang 2025, isa ka pagtaas sang 11.5% kon ipaanggid sa 31,980 metric tons sang 2024.
Apang, ang lokal nga produksyon nagasabat lamang sang ginabanta 40% sang kape sang pungsod, amo gihapon ang Pilipinas nagasalig sa imported nga kape.
