Gin-report sang Philippine Coconut Authority (PCA), nga nagnubo sang 20% ang produksyon sang niyog sa pungsod subong nga tuig, tuga sang tuman nga tag-ilinit bangud sa El Niño sadtong una nga bahin sang 2023 kag asud-asod nga bagyo sa ulihi nga bahin sang tuig.
Suno kay Luz Brenda Balibrea sang PCA, naapektuhan man ang produksyon sang coconut oil nga nagnubo sang 15%.
Apisar may pagnubo, nagapabilin nga pangaduha ang Pilipinas sa pinakadaku nga prodyuser sang niyog sa bug-os nga kalibutan.
Dugang ni Balibrea, indi lamang ang Pilipinas ang nakaeksperyensya sang kakulangan bangud apektado man ang pangkalibutanon nga suplay sang mga vegetable oil.
Bilang sabat, ginaduso sang PCA ang lapnagon nga pagtanom kag replanting sang niyog.
Target sang administrasyon ni Pangulong Ferdinand Marcos Jr. nga makatanom sang 100 million nga puno sang niyog, kun sa diin 8.5 million na ang natanom sadtong nakaligad nga tuig kag 25 million pa ang target subong nga 2025.
Gin-athag man sang PCA nga wala sang ipatuman nga export ban sa mga produkto nga niyog bangud ini ang nagapanguna nga export commodity sang pungsod.
