Nagapati ang National Irrigation Administration (NIA) nga lalo pa nga magataas ang produksyon sang palay sa 2025.
Suno kay NIA Administrator Aduardo Guillen, kasunod na man ini nga lalo pa nga pagtaas sang numero sang mga irrigation facilities kag mga dam sa pungsod nga makabulig para mapatubigan ang mga talamnan sang palay.
Ginahalimbawa sang opisyal ang mga bag-o nga dam nga ginbuksan sang damlag lang sa nagkalain-lain nga bahin sang pungod kasubong sang Western Visayas, Cordillera, Central Luzon, kag iban pa.
Makabulig ang mga ini suno diri agud mapabaskog ang lokal nga industriya sang bugas sa bulig na man sang mga mangunguma kag sa gobyerno.
Maluwas diri, magamit man ang bag-o nga gintukod nga cropping calendar nga kun sa diin ang duha ka cropping season sa karon sa mga NIA-irrigated areas ang pagahimuon na nga tatlo ka cropping season.
Gintumod man sang NIA Administrator ang ‘incorporation’ ukon pagsulod kag pagpakigbahin sa konsepto sang irigasyon sa mga flood control projects sang Department of Public Works and Highways (DPWH).
Sa idalom sini, nagtingub ang NIA kag DPWH sa pagplano sa mga ginahimo nga flood control facilities nga kun sa diin ginaipon ang mga tubig sa mga nasambit nga pasilidad agud magamit sa mga ulumhan.
Matandaan nga una na nga ginpabugal ni PBBM ang tubtob 5,500 flood control projects kag mga bag-o nga dam nga gintukod sa idalom sang administrasyon sa pinaka-ulihi nga SONA sini.
