Nagpanawagan ang National Tobacco Administration (NTA) sa tanan nga mga researcher kag technical experts nga dugangan pa gid ang ila mga panikasog kag dedikasyon sa paghimo kag pagtukod sang mga teknolohiya nga epektibo sa gasto apang mataas ang kalidad para sa produksyon sang tabako.
Ang mayor nga katuyuan sang sini nga panawagan amo ang pagsiguro kag pagpadayon sang pangkalibutanon nga pagkakompetensya sang tabako nga lokal nga ginapatubo kag ginapatubas sa aton pungsod.
Sa sulod sang tatlo ka adlaw nga Project Technical Review kag Tobacco Production Technology Updating Workshop, nga gintambungan sang nagkalainlain nga mga eksperto kag mga stakeholders sa industriya sang tabako, ginhatagan pagtamod ni NTA Administrator Belinda Sanchez ang importante nga kinahanglanon para sa padayon nga kabag-ohan kag maid-id nga pagpanalawsaw agud epektibo nga masuportahan ang aton mga mangunguma sang tabako sa bug-os nga pungsod.
Gindayaw ni Administrator Sanchez si Deputy Administrator for Operations Nestor Casela kag ang iya dedikado nga research team para sa ila wala untat nga pagtinguha sang mga inisyatibo sa pagpanalawsaw kag pagpauswag sang NTA.
Dugang pa, gin-engganyo ni Administrator Sanchez ang tanan nga mga partisipante sa workshop nga gamiton ini nga kahigayunan agud labi pa nga mapabakod ang mga operasyon sa latagon sang ahensya.
Ini paagi sa pagbayluhanay sang ihibalo, pagpaambit sang pinakamaayo nga mga buhat, kag pagbinuligay agud mas maserbisyuhan ang aton mga mangunguma sang tabako kag ang bug-os nga industriya.
