Nagpahayag sang pagkadismaya ang isa ka progresibo nga grupo matapos nga indi magtambong si former President Rodrigo Duterte sa status conference sang iya kaso sa International Criminal Court subong nga adlaw.
Sa interview sang Bombo Radyo kay Raoul Manuel, Karapatan National Council Member, iya ginpahayag nga padayon na lang nga ginagamit sang kampo ni Duterte ang isyu sang iya ikaayong lawas bilang rason sa indi pag-atubang sa korte, humalin pa sang confirmation of charges proceedings.
Suno kay Manuel, importante nga personal nga mag-atubang sa korte ang anay presidente kag indi lang pirmi mga abogado sini ang naga-representar sa iya.
Pahayag pa niya, kun matuod nga nagalala ang kondisyon sang ikaayong lawas ni Duterte, dapat lamang nga magpakita ini sa publiko agud mapamatud-an ang ginapahayag sang iya kampo.
Dugang pa sini nga importante ang status conference bangud diri pagahinalaan ang posible nga schedule sang trial, pagpasa sang dugang nga dokumento, ebidensya, mga testigo sang kampo sang mga biktima kag iban pa nga mga argumento may kaangtanan sa kaso.
Nagalaum naman ang natungdan nga mangin positibo ang resulta sang status conference nga isa ka dalan pakadtu sa pag-angkon sang hustisya para sa mga biktima.
