Nagapanawagan ang grupo nga Pamalakaya Panay nga kanselahon na ang excise tax kag Value Added Tax (VAT) sa produktong petrolyo sa tunga sang padayon nga pagtaas sang presyo sang gatong.
Sa interview sang Bombo Radyo, ginpahayag ni Nathaniel Baga-ot, spokesperson sang Pamalakaya Panay, nga indi na bastante ang yara subong nga ayuda sang gobyerno bangud sa padayon nga pagmahal sang mga balaklon, ilabi na ang pagkaon, samtang wala pa nagataas ang sweldo sang mga mamumugon.
Sunokay Baga-ot, mabatyagan gid sang ordinaryo nga pumuluyo ang kabudlay sa adlaw-adlaw nga gastos apang kulang ang bulig nga ginahatag sang gobyerno.
Dugang pa ni Baga-ot, madugay na nila nga nagasinggitan kag nagapanawagan apang daw kaangay wala ini ginapamatian sang mga yara sa pwesto .
Nagalaum ang grupo nga mabatian na ang ila mga panawagan agud maibanan ang kabudlaysang publiko sa padayon nga pagtaas sang presyo sang gatong kag mga panguna nga balaklon.
