Nagapati ang progresibo nga grupo nga dako ang kinahanglanon sang dugang pa nga “people’s lawyers” bilang private prosecutor para magbulig sa nagapadayon nga impeachment case batok kay Vice President Sara Duterte sa Senado.
Sa interview sang Bombo Radyo kay Mr. Raoul Manuel, National Council Member sang Karapatan, iya ginpahayag nga importante nga mapalig-on pa ang legal support sang House prosecution panel pinaagi sa dugang nga mga abogado agud masiguro nga kompleto kag husto ang pagpresentar sang mga ebidensya kag argumento sa impeachment proceedings.
Suno kay Manuel, ang presensya sang mas madamo nga “people’s lawyers” makabulig agud mas mapabaskog ang tingog sang publiko kag mas mahatagan importansya ang interes sang mga pumuluyo sa proseso sang impeachment.
Nahibaluan nga sa Hunyo 18 gintalana sang Senate impeachment court ang pre-trial conference.
