Wala na sang daku nga ginapaabot pa ang isa ka progresibong grupo sa State of the Nation Address (SONA) ni President Ferdinand Marcos Jr. subong nga adlaw.
Sa interview sang Bombo Radyo Roxas kay David Michael San Juan, convenor sang Taumbayan Ayaw sa Magnanakaw at Abusado Network Alliance (TAMA NA) kag Kilusang Bayan Kontra Kurapsyon (KBKK), iya ginpahayag nga posible nga liwat lang nga mabatian sa SONA ang mga promisa nga ginhambal na sang presidente sa nagligad nga mga tuig.
Suno kay San Juan, nagalaum ang ila grupo nga ihatag sang administrasyon ang resulta sang imbestigasyon may kaangtanan sa gin-alegar nga mga iregularidad sa flood control projects sang pondo nga dapat kuntani makabenepisyo sa publiko.
Ginpangabay man sang grupo nga hatagan sang prayoridad ang kahimtangan sang mga nagasakop sa basic sector nga padayon nga nagaatubang sang nagkalain-lain nga mga problema kag krisis sa pungsod.
Nagalaum man ang natungdan sa nabilin nga tion sang administrasyon ni President Marcos nga mahimo pa nga mapatuman ang mga makahulugan nga mga programa kag polisiya nga magahatag sang benepisyo sa kadam-an sang mga Pilipino.
