Nanindugan si Education Secretary Sonny Angara nga ang promosyon sang mga opisyal kag empleyado sang Department of Education (DepEd) dapat base sa performance kag kontribusyon sa publiko, sa baylo nga sa ila political connection.
Ini ang ginpahayag sang tiglikom bilang kabahin sang iya mensahe sa pinakauna nga Literacy and Numeracy Expo cum Training of Trainers on the Institutionalization of Technical Assistance on Instructional Delivery nga ginhiwat sa syudad sang Iloilo kahapon.
Suno kay Angara, importante nga kilalahon kag hatagan sang nagakaigo nga oportunidad ang mga personnel nga nagapakita sang maayo kag tampad nga serbisyo publiko sa departamento.
Ginhatagan niya sang importansya nga ang tumalagsahon nga pagserbisyo sa pumuluyo ang dapat mangin mayor nga basehan sa pagkilala kag pag-asenso sang posisyon sang tagsa ka staff member.
Dugang pa sang tiglikom nga wala sang lugar sa DepEd nga maggamit sang “backer” ukon koneksyon sa pulitika para lang makakuha sang promosyon.
Ang katuyuan sini nga polisa amo ang pagpataas sang lebel sang propesyonalismo kag pagsiguro sang mataas nga kalidad sang edukasyon para sa mga estudyante sa bug-os nga pungsod.
