Wala sang patigayunon nga all-senator caucus ukon meeting nahangunod sa impeachment trial batuk kay Vice President Sara Duterte subong nga naka-break ang session sang Kongreso.
Ini ang ginpahayag ni Senate President Francis “Chiz” Escudero sa press briefing sang Senado.
Matandaan nga naghinyo ang minority bloc sang Senado kay Escudero sang all-senator caucus agud hinalaan ang mga plano sa palaabuton nga trial batuk kay Duterte.
Suno kay Escudero, nagpamalibad ang pila ka mga senador sa caucus bangud busy ang mga ini.
Samtang, ginplastar naman ni Escudero ang proposed calendar para sa impeachment trial batuk kay VP sara.
Sa pagbukas liwat sang sesyon sa Hunyo 2, igaprisintar sang prosecutors ang articles of impeachment kag aprubahan man ang revised rules of procedure sang impeachment trial.
Maga-convene naman sa Hunyo 3 ang Senado bilang impeachment court kag pag-abot sang Hunyo 4, diri na pasumpaon ang mga incumbent Senator judges.
Samtang, target nga sa Hulyo 30 ukon pagkatapos na sang State of the Nation Address (SONA) ni Pangulong Ferdinand Marcos Jr., suguran ang trial batuk kay VP Sara.
Subong man, napahibalo naman sang liderato sang Senado ang timetable sang tiral sa mga kaupdanan niya nga senador.
Gin-abisuhan man ni Escudero si House Speaker Ferdinand Martin Romuladez kag ang gin-akusaran nga si VP Sara angut sa ginahimo nga preparasyon sang Senado para sa impeachment trial.
Suno kay Escudero, ginhimo niya ini bilang kabahin sang iya nga katungdanan bilang senate president kag mangin presiding officer sang impeachment court, — indi bangud sa pressure ukon sa ginapasuni nga wala pa sang ginahimo nga aksyon ang senado sa impeachment batuk kay VP Sara.
