Naghingyo ang House prosecution panel sa Senado nga tugutan si National Bureau of Investigation (NBI) Director Melvin Matibag nga magtestigo subong nga adlaw, mas temprano pa sa natalana sini nga pag-atubang sa impeachment trial ni Vice President Sara Duterte.
Suno kay Iloilo Rep. Lorenz Defensor, naghingyo si Matibag nga magtestigo siya bangud magatambong siya sa regional summit sa Thailand nga iga-organize sang Federal Bureau of Investigation (FBI) sa kooperasyon sang Royal Thai Police.
Apang, ang pila ka mga senator-judges kag sang defence panel nagpamatok sa pangabay.
Suno sa depensa, kabaliskaran ini sa nauna nga direktiba sang impeachment court kag sa gintalana nga five-day notice rule para sa mga testigo.
Samtang, ginmanduan naman ni Senate Impeachment Court Presiding Officer Francis “Chiz” Escudero ang prosekusyon nga isumite ang travel authority kag official invitation ni Matibag antes magdesisyon ang impeachment court sa nasambit nga request.
