Ginkwestyon sang House trial panel ang hinali nga pagbag-o sang posisyon sang kampo ni Vice President Sara Duterte matapos nagpasugot ang depensa nga buksan ang sealed box sang mga dokumento gikan sa Bureau of Internal Revenue (BIR) para sa impeachment trial.
Suno kay House trial spokesperson Zia Alonto Adiong, apisar maayo ini nga tikang agud nga magpadayon ang kaso, makatilingala kun nga-a subong lang nagpasugot ang depensa sang natapos na ang pre-trial conference.
Madumduman nga hugot nga ginpamatukan sang mga abogado sang bise presidente ang pagpamarka lamang sa guwa sang nasambit nga kahon sang nagligad nga hearing.
Nagpabutyag man sang kabalaka si Adiong sa hingyo sang depensa nga maghiwat anay sang isa pa ka separado nga executive session para lamang sa pagbukas kag pagmarka sang BIR box.
Paandam sang mamalidha, mahimo lamang ini nga magtuga sang bag-o nga atraso sa pag-isyu sang pre-trial order kag sa pormal nga pagsugod sang trial.
Gin-athag ni Adiong nga ang pagbukas kag pagmarka sang mga dokumento wala nagakahulugan nga gilayon ini nga batunon bilang ebidensya bangud ang Senate impeachment court ang magadesisyun sa gihapon sini sa tion mismo sang pagbista.
Nagpanawagan ang prosekusyon nga likawan ang mga legal excuses agud makatutok ang tanan sa pagpresentar sang mga ebidensya kag testigo sa Hulyo 6.
