Gin-anunsyo ni Senador Erwin Tulfo nga wala sang ginlapas nga probisyon sang Konstitusyon ukon Rules of Court ang House prosecution panel sa pagbawi sang tatlo sa apat ka artikulo sang impeachment batok kay Vice President Sara Duterte.
Ini ang sabat ni Tulfo sa spokesperson ni Duterte nga si Atty. Paolo Panelo sa gin-alegar paghipos sang majority sang Senado sa tikang sang prosekusyon, nga suno sa iya nagresulta sa pag-usik sang indi magnubo sa P1 billion nga pundo sang publiko.
Suno kay Tulfo, ang pag-withdraw sang mga articles ang kabahin sang estratehiya sang prosekusyon, kag mahimo man nga gamiton sang depensa ang ila kaugalingon nga estratehiya sa tion sang pagpresentar sang ila mga ebidensya. Apisar nga nakibot ini sa nasambit nga tikang, wala man suno sa iya sang rason nga piliton sang mga senador ang prosecution nga ipadayon ang mga ginbawi nga kaso kon wala man sang paglapas sa pagsulundan.
Ginpanginwala man ni Tulfo nga may nagagamit sang ginaduso nga 2027 national budget agud i-pressure ang mga senador sa ila palaabuton nga pagboto sa impeachment trial. Ginpahayag man sini nga wala siya nakahibalo tuhoy sa posible nga pag-ilis kay Duterte kay House Speaker Faustino “Bojie” Dy III kon mapamatbatan ang bise presidente.
Sa pagbawi sang Article I, III kag IV, Artikulo II na lang ang nabilin sa impeachment trial. Ginalakipan sini ang mga alegasyon sang wala mapaathag nga manggad, indi kompleto nga pagbuyagyag sang mga pagkabutang kag kapaslawan sa pag-divest sang mga business interest, nga ginpanginwala ni Duterte.
