ROXAS CITY – Madayon na subong nga tuig ang pagpatigayon sang pila ka mga aktibidad sang Simbahang Katolika sa karon nga Semana Santa.
Ini ang ginkumpirmar ni Rev. Fr. Jose Arturo Emilio O. Arbatin, Kura Paroko sang Sta. Catalina Parish sa Mambusao kag tagpamaba sang Arkidiyoses sang Capiz.
Suno kay Fr. Arbatin, matapos nga ginpaidalom sa Alert Level 1 ang probinsya sang Capiz nga senyales agud pahalugaan ang pagsulondan sa mga hilikuton ilabi na subong nga Holy Week, nagpaguwa sang guidelines si Msgr. Cyril Villareal, archdiocesan administrator, sang Marso 5, natuhoy sa mga kahiwatan sa tagsa ka mga Parokya kag mission stations sa probinsya.
Ginpahayag diri nga sumugod sa Domingo de Ramos ukon kilala nga ‘Lukay-lukay’ sa Abril 10 tubtob sa adlaw sang Pagkabanhaw sa Abril 17, pagahiwaton na ang pila ka mga aktibidad sang Simbahan.
Sa Huwebes Santo, may yara sang ‘washing of feet’ sang mga apostoles apang indi puwede nga kumpletuhon ang 12 ka mga apostoles, bangud indi dapat magdugay ang selebrasyon sa sulod sang Simbahan, ikumparar sa kinaangdan.
Wala man sang matabo nga pagmalay-balay sang mga apostoles agud magpahalok sa imahe sang Santo Kristo.
Ginapahanugutan ang Visita Iglesia, apang tubtob alas-9 sa gab-i gid lamang nga bukas ang mga Simbahan.
Sa Biyernes Santo, pagahiwaton man ang Via Crucis sa sulod sang Simbahan kag may pagbasa sang Siete Palabras.
Sa tion sang prosisyon, may duha ka opsyon nga ginapatuman ang arkidiyoses, sa una nga opsyon – igasakay ang imahe sang Santos sa mga salakyan, kag magabantay gid lamang ang mga tumuluo sa kilid sang karsada nga pagalabayan sang imahe. Sa sini nga opsyon, ang imahe gid lang ang igaprosisyon.
Ini nga opsyon ang ginkumpirmar ni Fr. Arbatin nga pagasundon sang ila Parokya sa Sta. Catalina sa Mambusao.
Samtang ang ika-duha ang opsyon – maga-upod ang pumuluyo sa imahe, apang magahimo sang duha ka linya ang mga tumuluo agud patung-an ang Karo samtang nagapatigayon sang prosisyon. Diri, kinahanglan nga magkoordinar ang Parokya sa mga katapo sang kapulisan agud masunod sang hugot ang amu nga pagsulondan.
Bangud sini, ginapaalinton sang tagpamaba sang Simbahan nga magpakig-angut sa tagsa-tagsa nga Parokya ukon mission stations, sa pagasundon nga opsyon sa pagpatigayon sang prosisyon sa Biyernes Santo.
Padayon man ang pahanumdom sang Simbahan nga sundon ang pagsulondan sang gobyerno sa karon nga may pagpamahog sa gihapon sang COVID-19.
