Ginpanindugan sang Philippine National Police (PNP) nga importante nga tikang ang istrikto nga pagpatuman sang curfew sa mga menor de edad agud mapahilayo ang mga pamatan-on sa impluwensya sang mga sindikato, kadungan sini ginapasiguro ang hugot nga koordinasyon sa Department of Social Welfare and Development (DSWD) agud indi na masulit ang grabe nga pagginutok sa mga youth shelters.
Suno kay PNP Chief Police General Jose Melencio Nartatez, Jr., ang mayor nga tinutuyo sang ila kampanya sa idalom sang Safer Cities Initiative amo ang pag-amlig sa mga pamatan-on.
Nagpaandam ang opisyal nga masami nga ginatake-advantage sang mga kriminal kag sindikato ang mga menor de edad nga nagalinapta sa dalanon agud gamiton sa nagkalain-lain nga sahi sang kriminalidad.
Agud nga mapahagan-hagan ang kahadlok sang publiko kag sang nagkalain-lain nga sektor, nagapakig-angut ang kapulisan sa DSWD bilang preparasyon sa ginalauman nga pagdamo sang mga kabataan nga iga-rescue sa tion sang nighttime operations.
Ginhimo sang PNP ang tikang matapos nagpagguwa sang tuman nga kahangawa sang Children’s Legal Rights and Development Center (CLRDC) angut sa posible madasig nga pagginutok sang Bahay Pag-asa kun ginatos ka mga kabataan ang ma-round up sa sulod lamang sang isa ka gab-i.
Bilang sabat, ginpasalig sang pamunuan sang kapulisan nga ikonsiderar ang kaayuhan sang mga kabataan kag indi paglapas ang ila kinamatarung sa pagpatuman sang kasuguan.
