Roxas City – Ginpatawag sang administrador sang probinsya sang Capiz ang grupo sang mga mangunguma nga nagpatigayon sang hublag protesta sa atubang sang kapitolyo probinsyal.
Ginpahayag ni Provincial Administrator Edwin Monares nga ginpatawag niya ang progresibo nga grupo sa pagpanguna ni Mr. Angelo Orence sang grupo nga Anakpawis-Capiz.
Gin-istoryahan nanday Monares kag Orence angut sa isa ka dayalogo ang ila madugay na nga panawagan sa lokal nga gobyerno bangud sa halit nga natuga sang dry spell sa ila tagsa ka mga ulumhan.
Suno kay Monares nga wala man nagapabaya ang lokal nga gobyerno sang probinsya sa pagpanguna ni Capiz Governor Esteban Evan “Nonoy” Contreras kag nagpromesa nga buligan sila ulumhan pinaagi sa paghatag sang binhi sa mga mangunguma nga nahalitan ang ektarya.
Subongman, ginatun-an man sang gobyerno probinsyal ang paghatag sang financial assistance para sa mga mangunguma.
Nahibaluan nga una na nga nagpanawagan ang grupo sa gobyerno nga i-deklara ang state of calamity para mabuligan ang mga mangunguma nga apektado sang tig-ilinit sa probinsiya.
Tuman naman nga nadismaya ang progresibo nga grupo bangud kasubong wala sang pag-amlig ang lokal nga gobyerno sa ila kag ginabalewala lamang ang ila mga ginabakho.
