ROXAS CITY – Magapanaog lamang sa pwesto bilang provincial administrator si Dr. Edwin Chinel Monares kun mismo si Capiz governor Esteban Evan Nonoy Contreras ang magahambal sa iya.
Ini ang ginpahayag sang opisyal sa exclusive interview sang Bombo Radyo Roxas.
Kasunod ini sang gindihon nga open letter ni Board Member Weldie Apolinario nga naka-address sa gobernador nga nagaduso sang pagpa-revoke ukon pag-recall sang appointment sang administrador.
Suno kay Monares kinamatarong sang sinuman nga magpalayag sang iya opinyon ukon hibubun-ot sa baylo nga wala ini sang may ginalapas nga laye ukon public morals.
Apang suno sa opisyal, ang request nga pagpa-revoke sa iya ni Apolinario ang indi sang husto bangud may nagakaigo nga proseso para sa pagpahalin sa iya sa pwesto.
Panindugan sang opisyal nga ang pag-appoint sa iya sa pwesto ang gikan mismo sa gobernador kag nag-agi man sa Sangguniang Panlalawigan nga amo ang nagkompirmar sang iya appointment.
Kasunod diri ang maid-id nga pagtsekyar sang Civil Service Commission kun ensakto ang appointment kag kun kwalipikado ini para sa amo nga posisyon.
Ginklaro man ni Monares nga indi siya ang nagpangayo sang nasambit nga posisyon sa baylo ginhinyo ini mismo sang gobernador nga magbulig sa pangginobyerno sa Capiz.
Apang suno kay Monares kun mismo ang gobernador ang maghambal sa iya nga magbiya na sa pwesto, himpit sa tagipusuon niya ini nga batunon kag malipayon nga magabalik sa iya pribado nga kabuhi.
