ROXAS CITY – Ginkumpirmar sang Capiz Provincial Agriculturist Office nga may presensya sang ginatawag Pyrodinium bahamense, isa ka sahi sang organismo nga nagadala sang Paralytic Shellfish Poisoning ukon red tide sa kalalawran nga sakop sang Pilar, President Roxas, Ivisan kag Roxas City, ini ang ba-se sa ila nangin water sampling.
Ini ang ginpahayag ni Atty. Luvim Amores, Information Officer sang Capiz Provincial Government sang mainterview sang Bombo Radyo.
Suno diri, nakuha ang impormasyon sang gilayon nagpatawag sang emergency meeting si Governor Fredenil Castro kaupod sanday Mrs. Sylvia Dela Cruz sang provincial agriculturist, laboratory incharge kag pila ka opisyal sang BFAR kahapon sang aga matapos ang asud-asod nga insidente sang food poisoning.
Matapos makumpirmar, gilayon nga nagpaguwa sang public advisory ang gobyerno probinsyal agud mapaandaman ang pumuluyo nga maglikaw sa pagkaon, harvest, baligya, kag transport sang nagkasari-sari nga panginhason.
Kaangut diri, nagpadala sila sang meat sample sa central office sang BFAR sa Manila.
Nagpadala naman sila sang sulat sa mga alkalde sang kabanwahanan agud magpangayo sang kooperasyon kag kun mahimo magbulig palapnag sang impormasyon sa ila pumuluyo.
Magapatigayon man sila liwat sang sinapol kun magdugay pa ini agud mahinalaan ang mahimo mabulig sa mga mangingisda nga apektado sang red tide.
