ROXAS CITY – Handa nga hatagan sang nagakaigo nga atensyon kag solusyon sang provincial board ang mga ginaalegar kakulangan kag kapabayaan sang Roxas Memorial Provincial Hospital (RMPH) kasunod sang mga nabaton nga reklamo gikan sa ila mga pasyente.
Ini ang ginpahayag ni Vice Governor Jaime”Mitang” Magbanua sang mainteview sang Bombo Radyo.
Suno kay Magbanua nga magapatigayon sila sang imbestigasyon kaupod ang Sangguniang Panlalawigan natuhoy sa natabo nga pagkamatay sang apat ka mga pasyente sa Intensive Care Unit (ICU) sa RMPH, ang pagka-paralyzed sang butkon sang pito ka-tuig nga bata kag ang serbisyo nga ginahatag sang nasambit nga ospital.
Ginpahayag sang bise gobernador nga nakasugtan sa konseho nga i-refer sa Committee of the Whole ang pagtuon sa nasambit nga isyu.
Ginpahayag sini nga mayorya sa mga miyembro sang konseho ang nagapabor nga dapat nga imbestigahan ang natabo agud mahibaluan kun ano ang matuod nga rason sang kamatayon sang nasambit nga mga pasyente.
Indi man mapat-od ni Magbanua kun matuod nga ang wala gilayon mapaandar nga generator set ang rason sang kamatayon sang mga pasyente sa ICU bangud suno diri dapat nga pamatian ang magtimbang nga bahin agud mabal-an kun ano ang kamatuoran.
Matapos ang ila nga imbestigasyon suno kay Magbanua, ila man nga solusyunan kun ano ang makit-an nila nga nangin problema agud indi na masulit pa ang nasambit nga hitabo.
Samtang, gin-athag naman sang nasambit nga opisyal nga wala sila nagapamulitika bangud ginahimo lang nila ang ila obligasyon para sa kaayuhan sang mga pumuluyo.
