ROXAS CITY – Pasidungog nga ginakabig ni Mr. G. Antonio Arbis ang pag-iliher sa iya bilang National President sang Philippine League of Local Budget Officers (PHILLBO) incorporated sa ginhiwat nga convention kag election sang mga budget officers sa Baguio City sang Agosto 23.
Sa interview sang Bombo Radyo kay Mr. G. Antonio Arbis, provincial budget officer sang Capiz, iya ginsiling nga dugay niya na ini nga handom nga posisyon bangud luyag niya nga magbulig sa kasubong niya nga budget officers kag nagapasalamat siya sa oportunidad nga makapangalagad sa nasyunal nga lebel.
Plano nga proyekto ni Arbis ang maghimo sang isa ka website kun sa diin makit-an ang tanan nga budget officers sa pungsod kalakip ang ila mga impormasyon agud mangin madali ang pagcontact kag maplastar ang mga bag-o nga guidelines gikan sa DILG, DBM, CSC, kag iban pa nga ahensya nga nagaapekto sa paggobyerno sa local nga lebel.
Suno sa opisyal, 20 ka tuig na siya nga miyembro sang board of directors kag 33 ka tuig naman sa gobyerno probinsyal.
Nagapasalamat siya sa mga nakaupod nga nagboto sa iya amu man sa nagpangamuyo, kampanya, kag sa suporta ni Gov. Castro bangud napilian siya nga mangin presidente sang nasambit nga asosyon.
Ginasiguro ni Arbis nga himuon niya ang kutob sang iya masarangan agud magbulig sa pumuluyo sang Capiz.
