ROXAS CITY-Temporaryo nga pagalimitahan sang Provincial Government ang operasyon kag transaksyon sa Provincial Capitol kasunod sang pagpositibo sa COVID-19 sang duha ka mga empleyado sang Capitol.
Ini ang ginkompirmar ni Provincial Administrator Edwin Chinel Monares sang mainterview sang Bombo Radyo.
Ginkompirmar ni Monares nga duha ka mga empleyado nga residente sang Barangay Inzo Arnaldo Village, Roxas City kag banwa sang Panay ang duha ka mga nagpositibo sa kapitolyo nga lunsay mga naka-assign sa Provincial Governors Office.
Ginpahayag ni Monares nga limitado lamang ang transaksyon sa mga indibidwal sulod sang lima ka adlaw sumugod sa Lunes.
Suno kay Monares nga magapatigayon naman sang disinfection sa bug-os nga kapitolyo agud malikawan ang paglapta sang virus.
Apang may yara man sang igapahamtang nga triage sa likod sang Capitol para sa mga indibidwal nga may yara sang importante nga transaksyon.
Gin-athag sini nga wala man ginpaidalom sa lockdown ang kapitolyo apang pagalimitahan lamang ini sa mga tawo.
Dugang pa ni Monares nga ipaidalom man sa skeletal work force ang mga empleyado.
Samtang natalana naman nga ipaidalom sa rapid test ang mga empleyado sang kapitolyo kalakip na ang mga matag-as nga opisyales.
Ginkompirmar man sini nga igapaidalom sa RT-PCR test kalakip na ang gobernador kag magtaas nga mga opisyales sa Provincial Governors Office.
