Roxas City – Ginmanduan ni Capiz Police Provincial Office (CPPO) Director Police Col. Canelo Fuentes ang tanan nga mga pulis nga dapat ubrahon sang ensakto ang ila tagsa ka mga obligasyon.
Ginhimo ni Fuentes ang nasambit nga mensahe sa turn-over of command ceremony kasunod sang pagbiya ni Police Lt. Colonel Dante Tayco bilang hepe sang Roxas City PNP kag pagtal-us sa iya ni Police Lt. Col. Ricardo Jumuad.
Ginpahayag ni Fuentes nga kun mahimo kada-adlaw may yara sang na-assign nga mga pulis sa palibot sang siyudad agud magbantay kag maghatag sang seguridad sa mga pumuluyo.
Ginkumpara man ni Fuentes ang trabaho sang mga police personnel sa mga Traffic Auxillary sang Traffic Management Unit nga kasubong nagabulad sa initan kag nagabantay sa mga dalanon.
Kinahanglan nga hatagan sang importansya sang mga pulis ang ila responsibilidad.
Mahibaluan nga naga-sweldo ang mga pulis sang 32 mil pesos kada bulan samtang ang TMU naman ang may yara lamang sang 6 mil tubtob 8 mil pesos kada bulan.
Magluwas diri, ginpahayag man sang opisyal nga kun mahimo wala sang mga naka-standby nga mga pulis ukon nagapatawhay lamang sa oras sang ila duty.
