Gin-cancel ang pila ka mga aktibidad para sa Capiztahan Festival 2026 bilang kabahin sang pag-upod sa energy conservation sang gobyerno.
Suno kay Mr. Alphonsus Tesoro, Head sang Provincial Tourism and Cultural Affairs Office nga lakip sa mga nadesisyonan nga mga aktibidad nga kanselahon kag limitahan amo ang mga masunod:
*Tagbuanay sang Maragtas nga ginalakipan sang Fluvial parade, foot parade kag caravan
*Parade of Floats
- Pag-downsize sang Ponsyon sa Kabanwahanan
*Pagtalana sang isa na lang ka Fireworks Display sa baylo nga tatlo
Pahayag pa ni Tesoro, ang nasambit nga mga tikang ang kabahin sang pag-upod sang Capiz Provincial Government sa panawagan sang office of the President nahanungod sa energy conservation kun sa diin nagtukod sila sang Ad Hoc Committee sa idalum sang Memorandum no. 57 nga ginpagwa ni Capiz Governor Fredenil Castro nga may tinutuyo nga i-review kag magkinot sang gastos para sa Capiztahan.
Ginsiguro man sang natungdan nga magapadayon ang iban pa nga nabilin nga aktibidad sa natalana sini nga lugar kag oras.
Samtang, gin-athag naman sang Provincial Government sang Capiz nga magapabilin ang simbolismo sang Capiztahan Festival 2026 apisar sang pagbag-o sa pila ka mga aktibidad.
Suno kay Atty. Luvim Amores, Provincial Information Officer kag Concurrent Provincial Human Resource Management Officer nga ang austerity measures nga ginapatuman para sa selebrasyon sang Capiztahan Festival 2026 ang sandig sa National Energy Emergency nga gindeklara ni President Ferdinand Marcos Jr., agud masiguro ang mas responsable nga paggamit sang enerhiya sang gobyerno.
Pahayag pa niya, magapadayon sa gihapon ang paghatag sang isa ka masadya, makahulugan, kag maduagon nga selebrasyon sang ika-125th anniversary sang pagtukod sang civil government sa probinsya sang Capiz.
Dugang pa niya,ang mga artista nga naka-line up para sa Capiztahan ang magapadayon bangud pila sa mga ini ang sponsor sang pila ka mga pribado nga indibidwal kag madugay na nga na-book na gani indi na ma-cancel pa.
Nahibaluan nga ang Capiztahan Festival ang ginkilala nga Best Cultural Festival sang ATOP Pearl Awards sang duha ka sunod nga tuig gani padayon sa gihapon ang pagsaulog sang maragtason nga kahiwatan.
