ROXAS CITY, CAPIZ – Ginpatpat sang Provincial Health Office ang importansiya sang pagselebrar sang Family Planning Month subong nga bulan sang Agosto.
Sa interview sang Bombo Radyo Roxas kay Dr. Leah L. Del Rosario, Health Officer I sang Provincial Health Office, iya ginpahayag nga tinutuyo sang Family Planning Month nga palaparon ang ihabalo sang publiko sa mga benepisyo sang responsable nga pagpamilya.
Suno kay Del Rosario, importante ang family planning indi lamang para sa ikaayong lawas sang iloy kag sang lapsag, kundi pati man sa kabug-usan nga welfare sang pamilya kag komunidad.
Ginpunto man sini ang mas mataas nga access subong sa nagkalain-lain nga sahi sang family planning services nga ginahatag sang gobyerno kasubong sang libre nga konsultasyon, contraceptives, kag counseling.
Dugang pa sang natungdan, padayon ang Provincial Health Office sa pagpatuman sang mga outreach programs kag information campaigns sa mga barangay agud mas madamo nga pumuluyo ang malab-ot kag mapalapnag ang awareness angut sa family planning.
Ginganyat man niya ang mga kalalakinhan nga makigbahin sa sini nga isyu bangud indi lamang kababainhan ang may salabton sa pagplano sang pamilya.
Nagapanawagan si Dr. Del Rosario sa publiko nga suportahan ang kampanya subong nga Family Planning Month agud maduso ang mas healthy kag mas planado nga buwas-damlag para sa kada pamilya nga Pilipino.
