Naghatag sang mga safety tips ang Provincial Health Office agud ma preparahan ang panahon sang tag-ulan.
Sa interview sang Bombo Radyo kay Jennelyn Gardose, Nurse I sang Tapaz District Hospital, iya ginpahayag nga mangin updated kita sa mga balita sa radyo ukon social media ilabi na sa Bombo Radyo Roxas agud mahibaluan ang dalagan sang panahon kag kun may yara sang bagyo kag ang mga lugar nga mangin evacuation centers.
Suno kay Gardose, kinahanglan nga yara sa kondisyon ang mga salakyan antes magbyahe, magdala sang payong kag kapote kag sa tion nga magtaas na ang baha indi na mag risgo sa pag tabuk kag magpangita na sang alternatibo nga ruta.
Pahayag pa niya, ang tagsa ka panimalay may yara dapat sang emergency bag ukon ‘Go Bag’ bilang preparasyon sa bisan ano nga klase sang kalamidad nga may unod kaangay sang tubig, mga pagkaon, bayo ,toiletries, emergency kit kag mga bulong.
Dugang pa sang natungdan, maghalong man sa mga balatian nga tuga sang tag-ulan kasubong sang water-born disease, influenza-like disease ukon trangkaso, leptospirosis kag dengue.
Nagpahanumdom man si Gardose nga dapat mangin maalam sa paghibalo sang lakat sang panahon, mangin alerto kag mangin safe sa subong nga panahon sang tag-ulan.
