ROXAS CITY – Madinalag-on nga naaresto ang isa ka persona sa gintingub nga puwersa sang Provincial Police Drug Enforcement Unit (PPDEU), Philippine Drug Enforcement Agency (PDEA)-Capiz kag Station Drug Enforcement Team (SDET) sang Roxas City PNP, sa Pueblo de Panay, Barangay Lawaan, sini nga syudad, kagab-i sang Huwebes.
Ginkilala ang nadakpan kay Salvino Lara Albino, 31-anyos kag residente sang Barangay Punta Tabuc, Roxas City.
Nakuha sa posesyon ni Albino ang 14 tanan ka sachets sang ginapatihan shabu, ginabulubanta may kabug-aton nga 53 gramo kag nagabalor sa P360,400, P7,500 nga buy bust money kag cellphone.
Nahibaluan nga anay preso si Albino sa kaso nga may kaangatanan sa paggamit kag pagduso sang iligal nga droga matapos nadakpan sang Setyembre 2016, apang nahilway ini subong nga 2022 pinaagi sa plea bargaining agreement.
Liwat ini nga namonitor sang mga kapulisan nga wala nagbag-o sa iligal nga bulohaton, rason nga ginkasahan ini sang buy bust operation.
Sa karon, nagapabilin ini sa karsel sang Roxas City PNP para sa pagpasaka sang kaso nga paglapas sa RA 9165 ukon Comprehensive Dangerous Drugs Act of 2002.
