BOMBO ROXAS – Padayon ang price monitoring sang provincial veterinarian’s office sa presyo sang baboy sa probinsiya sang Capiz.
Ini sa kainitan sang pagduging sang African Swine Fever (ASF) sa Luzon nga naglapta na sa Luzon.
Ginpahayag ni Dr. Leonel Abordo, provincial veterinarian nga talalupangdon ang pagtaas sa presyo sang baboy sa merkado bangud sa epekto sang African Swine Fever matapos madamo nga mga baboy ang nagkalamatay sa Luzon area.
Apang nagpasalig si Abordo nga bastante ang suplay sang baboy, manok kag karne sang baka sa mga merkado bangud padayon ang local production sang mga livestock owners.
Kumpyansa bisan paano ang opisyal nga indi makalab-ot sa Western Visayas ang ASF bangud antes pa man naglapta ini may pila na ka mga tikang nga ginpatigayon ang gobyerno kasubong na lamang sa pagdumili sa pagsulod sa probinsiya sang mga truck van nga gikan sa Luzon.
Gindumilian man ang pagsulod sa probinsiya sang mga processed meat.
Nagpahanumdum man ini sa mga tag-iya sang restaurants kag sa mga pumuluyo nga likawan ang pagbakal sang imported meat bangud posible ini ang makadala sang kahalitan sa probinsiya.
Nagpanugyan man si Abordo sa mga residente nga nagahupot sang baboy, pananglitan nga may makita nga pila ka mga pagbag-o sa baboy, gilayon ini nga impormahon ang talatapan para makahimo sang nagakaigo nga tikang.
