ROXAS CITY – Nagpanindugan si Provincial Administrator Edwin Monares nga wala ini makapadulong sa Metro Manila nga tuman nga naapektuhan karon sang coronavirus disease (COVID-19).
Sa interview sang Bombo Radyo, ginpahayag sang administrador nga wala siya makasulod sa Metro Manila kag wala man makapadulong sa mga lugar nga infected sang nasambit nga virus.
Suno diri nga sa iya pagpauli sa Capiz, nagsunod man siya sa pila ka mga proseso kapareho sang social distancing kag pagsumiter sang health declaration agud masiguro nga indi siya makadala sang halit sa iya pagbalik sa probinsiya.
Suno pa sa iya nga wala man sang posibilidad nga infected sang nasambit nga virus ang iya mga nakasakay bangud nagpaidalom man sila tanan sa nagakaigo nga proseso antes nagbiyahe.
Ginpahayag sini nga Marso 16 siya nag-abot sa probinsiya antes pa man ginpaidalom sa community quarantine ang bilog nga rehiyon sang Luzon.
Gin-aku man sini nga nagpadulong siya sa venue sang sinapol sang Provincial Development Council (PDC) sang siya ang nag-abot apang wala na ini makahingagaw.
Aminado man ini nga nagpadulong siya sa kapitolyo-probinsiyal bangud may mga gintapos pa ini nga pila ka mga hilikuton.
Apang agud indi na makatuga pa sang pagkahangawa suno sa administrador, ginpakamaayo na lamang sini nga ipaidalom ang iya kaugalingon sa self-quarantine.
Dalayawon man suno sa iya ang pagka-vigilante sang Sangguniang Panlalawigan batuk sa nasambit nga balatian rason nga ila ginaduso nga mapaidalom sa lockdown ang kapitolyo agud ma-disinfect.
