ROXAS CITY – Isa-isa nga ginsabat ni provincial administrator Dr. Edwin Chinel Monares ang pila ka mga rason nga nasaad sa open letter ni Board Member Weldie Apolinario nga naka-address kay Capiz governor Esteban Evan Nonoy Contreras nga nagapa-revoke ukon nagapa-recall sa iya appointment sa amo nga posisyon.
Sa exclusive interview sang Bombo Radyo Roxas, ginsabat ni Monares ang ginpahayag ni Apolinario nga wala siya sang ‘professionalism’ kag indi kabalo magpakig-upod sa iya mga kaupdanan sa gobyerno-probinsiyal ilabi na sa Sangguniang Panlalawigan.
Ginpanindugan ni Monares nga may yara sang duha ka separado nga sangay ang gobyerno nga amo ang executive kag legislative kag si Contreras lamang ang ginakabig sini nga ‘boss’.
Indi naman suno diri patas nga tawgon siya nga arogante bangud gid lamang wala siya nagasunod sa mga luyag nga matabo sang SP.
Suno sa iya nga wala siya sang batasan sang pagka-arogante bangud pigado lamang ini kag ginagamit niya gid lamang ang iya posisyon para sa serbisyo-publiko.
Aminado man ini nga indi sila magkapareho sang gobernador bangud si Contreras ang isa ka pulitiko samtang siya ang isa ka administrador.
Wala naman ginahatagan sang bug-at ni Monares ang open letter ni Apolinario bangud suno sa iya normal lamang ang pagpabutyag sang sentimyento sa baylo nga wala ini sang may ginalapas nga laye.
Kasubong ginalauman naman ni Monares ang kasubong sini nga mga hitabo bangud nahangpan niya nga kalakip ini sa iya pagbaton sang posisyon bilang administrador.
