ROXAS CITY – Nagduso sang isa ka resolusyon ang Sangguniang Panlalawigan nga nagarekomendar kay Capiz governor Esteban Evan ‘Nonoy’ Contreras nga magpapanaog sang cease and desist order agud temporaryo nga mapauntat ang quarry operation sa Barangay Lonoy, Roxas City.
Ini ang ginkompirmar mismo ni Board Member Matthew Hachuela, chairman sang Committee on Environment sang Sangguniang Panlalawigan sang mainterview sang Bombo Radyo.
Mahibaluan nga una na nga nagpatigayon sang committee hearing ang nasambit nga komitiba kasunod sang ginpalab-ot nga reklamo sang mga pumuluyo sa nasambit nga barangay bangud sa houl nga natuga sang quarry operation nga ginapanag-iyahan ni Rona Linaga.
Ang resolusyon nga ginduso ni Hachuela ang gin-updan man sang mayorya sang mga miyembro sang Sangguniang Panlalawigan.
Mahibaluan nga luyag sang SP nga mapauntat ang operasyon sang quarry sa lugar bangud sang pila ka mga bayolasyon sang operator sini.
Suno kay Hachuela nga ginakonsiderar nila ang ginpalab-ot nga reklamo sang mga residente.
Matandaan nga ginareklamo sang mga residente ang houl nga tuga sang quarry operation sa ila lugar kalakip na ang pagbaha sa tion nga magbubo ang mamunog nga ulan kag tuman ka gap-od naman kun mainit ang tiyempo.
