ROXAS CITY – Ginkompirmar sang chairman sang Committee on Appropriation sang Sangguniang Panlalawigan nga posible sa masunod nga semana maga-reconvene ang Provincial Development Council agud hinalaan ang pag-amyenda sang Annual Investment Program (AIP) 2020.
Ini ang ginpahayag ni Board Member Jonathan Sonny Besa sang mainterview sang Bombo Radyo.
Suno kay Besa nga nagapakighinala ini sa pinuno sang Provincial Development Planning Office (PDPO) kag didto iya nahibaluan nga sa Marso 12 gintalana ang pag-reconvene sang PDC agud mahinalaan ang pondo sang gobyerno-probinsiyal nga wala maaprubahan sang legislative department bangud sa isyu sang duplikasyon sang mga proyekto.
Ginkompirmar man ni Besa ang iya pagtambong sa nasambit nga sinapol bangud sa tanan nga miyembro sang SP suno diri, siya lamag ang kabahin sang PDC.
Positibo man si Besa nga pagatambungan ini sang tanan nga mga alkalde kag iban pa sa handom nga dalayon na nga maaprubahan ang amo nga pondo.
Gindugang pa ni Besa nga ginhambalan niya naman ang pinuno sang PDPO nga antes ang pag-reconvene sang PDC, hatagan nila sang kopya sang amended AIP 2020 ang SP agud ila ini nga matsekyar.
Ginkompirmar man ni Besa nga nakapadala na sila sang sulat ukon imbitasyon sa gobernador, mga department heads kag hospital officials para magtambong sa patigayunon nga budget hearing sang SP.
Matandaan nga ginkasugtan sang provincial board nga hatagan sang ‘last chance’ ukon katapusan nga kahigayunan ang gobernador nga patambungon ang gina-imbitar nga mga indibidwal kag kun indi sa gihapon ini mahimo, diri na kag magadihon sang legal nga aksiyon ang legislative department batuk sa gobernador.
Matandaan nga kalakip sa gin-imbitar sang provincial board sa ila sesyon amo ang Provincial Administrator, Provincial Engineer, Provincial Budget Officer, Provincial Health Officer, Chiefs of Hospitals kag pila ka katapo sang RMPH apang makaduha ka beses nga ‘no show’ ang mga ini.
