ROXAS CITY – Indi pabor ang Provincial Director sang Capiz Police Provincial Office nga pabuligon ang mga tsismosa sa contact tracing subong nga Coronavirus disease 2019 (COVID-19) pandemic.
Sa interview sang Bombo Radyo kay Police Colonel Julio Gustilo Jr., ginpahayag sini nga magaresulta lamang sang sala ang pagpatigayon sang contact tracing kun sa ila mismo magahalin ang impormasyon.
Suno kay Gustilo, sa contact tracing, may yara sang ginasunod nga guidelines ang mga kapulisan sa diin maathag nga ang mga nagakadapat nga magpatigayon sang contact tracing amo ang nagakaigo nga mga ahensya kapareho sang Department of Interior and Local Government, Department of Health kag hanay sang pulisya.
Ini bangud may yara sang iban nga nagahimo-himo lamang sang istorya nga kasubong halos indi mapatihan.
Dapat nga magpaidalom man sa nagakadapat kag maid-id nga validation ang mga impormasyon nga nagahalin sa mga tsismosa ukon ginakabig mga CCTV sang barangay.
Magluwas diri, mabudlayan pa sila nga i-validate ang mga impormasyon nga ipalab-ot sang mga tsismosa/tsismoso.
