ROXAS CITY — Ginmando na ni Capiz Governor Esteban Evan Contreras II sa Provincial Budget Officer kag Provincial Treasurer ang pagproseso kag paghatag insigida sang financial assistance sang gobyerno probinsiyal sa siyudad kag mga kabanwahanan sa probinsiya agud magamit para sa ila mga coronavirus disease 2019 (COVID-19) frontliners.
Sa gin-isyu nga Memorandum Order No. 46-2020 sang gobernador kahapon, nakasaad nga magahatag ang probinsiya sang tig-P100,000.00 nga financial assistance sa siyudad kag mga kabanwahanan sa Capiz.
Ini ang gamiton sang mga lokal nga gobyerno sa paghatag sang kinahanglanon sang mga frontliners nga nagapanguna sa pagpakigbato sa COVID-19 sa ila nasakupan nga mga lugar.
Sandig naman sa Memorandum Order No. 47-2020 nga gin-isyu subong nga adlaw, hatagan man sang tig-P5,000.00 nga financial assistance ang 473 ka mga barangay sa probinsiya bilang ayuda sa mga Barangay Emergency Response Teams.
Mahibaluan nga sang Martes napasar na sa sesyon sang Sangguniang Panlalawigan ang Annual Approriations Ordinance nga naga-unod sang P1,857,123,064.00 nga annual budget sang probinsiya.
Sa amo nga budget P10,000,000.00 ang gin-alokar sang sanggunian para lamang sa COVID-19 response sang probinsiya nga magluwas pa sa nakapain na nga daan nga calamity fund.#
