ROXAS CITY – Nagsabat na ang OIC- Provincial Health Officer sang Capiz Provincial Health Office natuhoy sa mga reklamo nga ginpalab-ot sa iya sang alkalde sang Tapaz, Capiz.
Sa interview sang Bombo Radyo Roxas kay Dra. Leah Del Rosario, nga wala ini sang ihibalo kun sa diin naghalin ang mga statement nga ginapatutu sa iya ni Tapaz Mayor Roberto Nonong Palomar natuhoy sa iya mga katungdanan kag obligasyon sa nagakaigo nga talatapan.
Suno kay Del Rosario nga ang game plan ukon mga plano sang probinsya batuk sa COVID-19 ang sandig sa guidelines sang National Inter Agency Task Force ukon NIATF kag Regional Inter Agency Task Force.
Subongman ang mga executive order ukon EO’s sang lokal nga gobyerno kag sang nagakaigo nga mga ahensya sang gobyerno.
Gin-athag ni Del Rosario nga indi lamang ang PHO ang nagadesisyon sang mga plano agud malikawan ang COVID-19 sa probinsya.
Dugang pa sini nga kun may sang mga mando nagikan sa mga national agencies gilayon niya man sini ginapalab-ot sa mga Municipal Health Offices sa probinsya.
Magluwas diri, ginpahayag ni Del Rosario nga wala ini nakabaton sang request nagikan kay Palomar angut sa pagpahamtang sang medtech sa ila banwa.
Suno kay Del Rosario nga kun may yara man sang ginapalab-ot ang mga LGU’s sa ila talatapan gilayon man sini gina-facilitate kag wala ginabalibaran.
Pag-abot naman sa pagdumala sang Roxas Memorial Provincial Hospital (RMPH) sa mga COVID-19 patients gin-athag sini nga wala sang kapasidad ang PHO nga makadesisyon kun ano ang nagakadapat nga himuon bangud may yara man sang pamunuan ang amo nga ospital.
Ginpahayag ni Del Rosario nga kun may yara man sang plano ang RMPH gilayon man ginapatawag ang talatapan sang PHO agud hinalaan ang plano sang amo nga pasilidad sa pagbaton sang mga pasyente partikular na sa mga COVID-19 patients.
Apang, gin-athag sini nga wala sa iya naghalin mismo ang plano nga indi pagbaton sang RMPH sa mga COVID-19 asymptomatic patients bangud nadesisyunan ini sang kadam-an agud malikawan man ang pagginutok sa amo ospital.
Samtang, padayon sa gihapon ang pagbaton sang amo nga ospital sang mga pasyente nga nagasuprehir sang iban pa nga balatian.
Nagpanawagan namn si Del Rosario sa publiko nga kun mahimo nga mag-kooperar na lamang ang tanan agud nga indi na magsaka pa ang kaso sang COVID-19 sa probinsya.
