ROXAS CITY – Ginpasalig sang Provincial Veterinarian Office nga hugot ang ila nga ginapatuman nga mga lihok agud mapunggan ang pagsulod sang African Swine Fever (ASF) sa probinsiya sang Capiz.
Suno kay Provincial Veterinarian Dr. Leonel Abordo, ini ang kasunod sang mandatu sang Department of Agriculture (DA) Regional Office 6.
Apang sa karon suno diri, wala sang dapat nga kabalak-an ang pumuluyo bangud nagapabilin nga hilway sa ASF ang probinsiya.
Wala man sila nagauntat sa ila nga koordinasyon sa mga local government units (LGUs), mga municipal agriculturists kag mga quarantine officers.
Padayon man ang ila nga pagpakig-angut sa Philippine Ports Authority (PPA) agud masiguro nga hilway sa nasambit nga virus ang mga gina-supply nga baboy kag iban pa nga karne sa probinsya.
Nagaapelar man ini sa publiko nga mag-ugyon sa ginapatuman nga mga pagsulundan sang mga otoridad kag likawan ang magpalusot sang mga karne sang baboy gikan sa mga lugar nga apektado sang ASF.
Matandaan nga una na nga napirmahan sang gobernador sang probinsiya ang amended executive order nga nagasiling nga bawal na nga magpasulod sa probinsiya sang mga buhi nga baboy kag processed pork products gikan sa iban nga lugar nga apektado sang ASF.
