ROXAS CITY – Ginapanindugan sang bag-o nga district engineer sang Department of Public Works and Highways (DPWH) Capiz 1st Engineering District nga indi mahimo nga ma-transfer ang proyekto nga gikan sa national fund sa mga proyekto sa lokal nga area.
Ini ang ginpahayag ni Engr. Randolfo Melosantos sang ma-interview sang Bombo Radyo, bilang sabat sa request sang Roxas City government nga gamiton ang pondo nga gin-alokar sa rehabilitasyon sang Atila Balgos – Legaspi road sa gubaon nga dalan sa Barangay Dayao.
Suno kay Melosantos nga hugot nga ginadumilian ang pag-realign sang national fund sa iban nga proyekto.
Personal man nga gin-inspection sang opisyal ang kontrobersiyal nga Atila Balgos-Legaspi road sa diin nagguwa nga kinahanglan na ini nga ipaidalum sa rehabilitasyon bangud sa poor condition.
Ginpasiguro ni Melosantos, may ginpa-in nga pondo ang ahensiya para sa gubaon nga dalan sa Barangay Dayao nga gina-alungay sang city government nga ipaidalum sa rehabilitasyon.
Dapat sang bulan pa sang Nobyembre ginsuguran ang Atila Balgos – Legaspi road bangud may tatlo tobtob apat ka bulan ang implementasyon sang proyekto, apang na-atrasar matapos wala ginhatagan sang permit ang contractor para masuguran ang nasambit nga proyekto.
Aminado man ang inhenyero nga sa 33 ka tuig sini nga pagpanerbisyo sa DPWH, subong pa lamang ini naka-expriensiya nga gin-upangan sang LGU ang proyekto sang gobyerno nasyunal.
Apang ginpahanumdum sini ang LGU sang instruksyon ni President Rodrigo Duterte nga indi dapat pag-idelay ang mga proyekto sang gobyerno bangud wala sang iban nga maka-benepisyo sini kundi ang mga pumuluyo.
