ROXAS CITY – Wala nagapati ang anay gobernador kag karon alkalde sang banwa sang Pontevedra nga dapat pareho ang kantidad sang proyekto nga mabaton sang mga kabanwahanan sang probinsiya sang Capiz.
Ginhimo ini nga pahayag ni Mayor Esteban Dodoy Contreras bilang reaksyon sa ginasiling request ni Mambusao Mayor Leodegario ‘’Jun’’ Labao Jr., sa gobernador nga mahatagan sang P5 milyones nga pondo ang mga alkalde sa kabanwahanan agud magamit sa pagtukod sang trabaho sa ila mga constituents.
Suno kay Mayor Contreras nga wala ini sang natandaan sang iya administrasyon bilang gobernador sadto nga palareho ang kantidad nga ginhatag sa mga alkalde sa kabanwahanan, bangud nagadepende ini sa kinahanglanon sang barangay ukon banwa kag nagadepende sa gihapon sa deskrisyon sang gobernador.
Aminado man ang alkalde nga wala sang malain sa nangin tikang ni Mayor Labao nga paghinyo sang P5 milyones sa gobyerno probinsyal basta mabatyagan lamang ang sinseridad sang tinutuyo sini.
Apang para kay Contreras nga tuman ka daku ang nasambit nga pondo kag pananglitan nga mahatag ini, ano ang matabo sa iban nga proyekto.
Nagapati ini nga importante sa gihapon nga mangin prayoridad sang mga opisyales ang mga butang sa diin makabenepisyo ang mga Capizeño.
