MANILA, Philippines – Ginpahayag sang Philippine Statistics Authority ukon “PSA”, nga mas mangin madali kag mas dasig na ang pagproseso sang mga petisyon para sa paginsaktu sang impormasyon sa civil registry matapos nga opisyal nga ginlunsar ang bag-o nga digital system nga Administrative Petition for Correction Automated System ukon Apcas.
Ang Administrative Petition for Correction Automated System “APCAS”, ginpatigayon agud mapadasig ang pagproseso sang mga petisyon nga sakop sang Republic Act No. 9048 kag RA 10172 nga naga tugot sa pagkorekta sang clerical ukon typographical errors sa pangalan, palayaw, petsa sang pagkatawo kag sekso sang isa ka persona.
Suno sa PSA, paagi sa bag-o nga sistema, mahimo nga mabuhinan sang masobra 80 porsyento ang processing time para sa ginatunaan nga 180,000 ka requests kada tuig.
Una nga ginpatuman ang Apcas sa pilado ka rehiyon sang tuig 2024 bilang pilot implementation, kag tubtob Abril 2026, yara na sa kapin 6,000 ka petisyon ang naproseso sa 201 ka local civil registry offices sa bug-os nga pungsod.
Antes sini, mano-mano ang pagproseso sang mga petisyon nga ginakabig isa sa mga rason sang pagdugay sang transaksyon.
Suno pa sa PSA, gikan sa 12 ka lakang, nahimo na lamang nga anum ka processing steps ang sistema lakip na ang screening, case assignment, review kag annotation processing.
Ginpabaskog man sang Apcas ang data security paagi sa secure virtual private network kag multifactor authentication agud maprotektahan ang sensitibo nga personal nga impormasyon sang mga aplikante.
Dugang pa diri, may yara man ini sang gender-inclusive feature nga naga tugot sa pag-attach sang medical certification para sa mga kaso nga may kaangtanan sa pagbag-o sang sex classification.
Nagalaum naman ang PSA nga paagi sa bag-o nga sistema, mas mangin episyente, mas transparent kag mas menos ang human error sa pagproseso sang mga correction petitions sa civil registry.
