Magapresentar ang House prosecution team sang mga opisyal gikan sa Philippine Statistics Authority (PSA) sa tion sang impeachment trial batok kay Vice President Sara Duterte suno kay House Prosecutor Terry Ridon.
Katuyuan sini nga tikang nga mapamatud-an ang mga alegasyon nga ang mga indibidwal nga ginaalegar nakabaton sang confidential funds halin sa Office of the Vice President (OVP) ang “fictitious” ukon himo-himo lang.
Suno kay Ridon, nalakip ang mga opisyal sang PSA bilang testigo angut sa ginaalegar misuse of confidential funds bangud sila ang nagpatigayon sang pagtuon kag ginbuyagyag ang findings sini sa tion sang House inquiry.
Ginreport man nga ginpakita sang pagtuon nga ang mga ngalan nga makita sa mga resibo sang pagkilala subong nanday Mary Grace Piattos, Milky Secuya, kag iban pa wala nagasanto sa bisan ano nga pagkatawo, kasal, ukon kamatayon nga narekord sa Pilipinas bangud wala sila sa mga rekord sang PSA.
Gani, tuyo sang prosekusyon nga ipakita nga ini mga peke, hinimo-himo nga mga indibidwal, nga nagapahangop sang mga iregularidad kag sala nga paggamit sang pundo sang publiko.
Una na nga gin-anunsyo sang kampo sang bise presidente sang Pebrero nga handa sila nga ipaathag ang paggamit sang “aliases” para sa confidential funds pareho sang recipient nga ginahambalan, “Mary Grace Piattos,” nga kaangay brand sang chichiria kag restaurant.
