CAPIZ-Ginkilala sang Philippine Army si Capiz Provincial Social Welfare and Development Office (PSWDO) Head Joerine Tan bilang recipient sang “Outstanding Bayanihan Partner Award” sang Setyembre 29, 2026, bangud sa iya suporta kag kontribusyon sa mga programa kag inisyatibo sang militar.
Ang award ginhatag sang 301st Infantry (Bayanihan) Brigade sang 3rd Infantry Division, Philippine Army, bilang pagkilala sa iya papel sa mga inisyatibo nga nagatuyo sa pagpalig-on sang mga komunidad kag pagpalapnag sang kalinong kag seguridad.
Ginpabutyag naman sang Gobyerno Probinsyal sang Capiz, sa idalum sang pagpamuno ni Governor Fredenil H. Castro, ang pagbugal sa pagkilala nga nabaton ni Tan, nga nagaserbisyo sa probinsya paagi sa mga programa kag bulig para sa kaayuhan sang mga pumuluyo.
Ang pagkilala nagahatag-dungog sa kontribusyon ni Tan sa pagserbisyo publiko kag sa pagpalig-on sang kooperasyon sa tunga sang mga ahensya sang gobyerno kag Philippine Army sa pagserbisyo sa komunidad.
