ROXAS CITY – Dugang nga P30 milyon nga pondo ang ginhatag sang provincial government sa Provincial Social Welfare and Development Office (PSWDO) para sa financial assistance nga igabulig sa pumuluyo sa probinsya sang Capiz.
Ini ang ginpahayag ni Mrs. Nieva Camposano, Capiz PSWDO Head sang mainterview sang Bombo Radyo.
Suno diri, ini na ang ila mangin annual budget ukon pondo sa sulod sang isa ka tuig.
Sakop sang nasambit nga pondo ang medical assistance kun sa diin mahimo magpangayo bulig ang pasyente sang inugbakal sang bulong, hospitalization kun sa diin pagabuligan pinansyal ang na-admit nga pasyente nga mahimo na makaguwa apang wala pa nakaimpas sang balayaran sa ospital, kag burial assistance, bulig sa mga pamilya nga nadulaan sang pinalangga sa kabuhi ukon himata nga nalakip sa indigent ukon imol nga pamilya.
Gintuad ni Camposano nga nagadepende ang igahatag nga kantidad sa assessment sang nagapangayo sang bulig kapareho sang presyo sang bulong ukon balayaran sa ospital, kag kun diin nagakuwa sang pangabuy-anan ang pasyente.
Pinakamanubo suno diri ang P1,000 samtang pinakamataas naman ang P100,000 nga bulig pinansyal.
Yari ang mga rekisitos sa nasambit nga sakop sang pinasyal nga bulig:
Medical assistance- medical certificate, preskripsyon gikan sa doktor, certificate of indigency, request letter direkta kay Gov. Fredenil “Oto” Castro, kag photo copy sang I.D kun sin-o man ang nagahikot sang assistance.
Sa hospitalization- hospital bill, request letter gikan kay Gov., kag valid I.D sang nagaproseso nga miyembro sang pamilya sang pasyente.
Sa burial assistance naman, kinahanglan ang death certificate, funeral contract, certificate of indigency, kag I.D man sang nagaproseso.
Ginsiling ni Camposano nga kun luyag magpangayo sang bulig, una nga magpadulong sa ila talatapan agud ma-assess kag marekomendar nila ang kantidad sang kuwarta nga igahatag ba-se man sa dokumento nga ginpasa, masunod nga magpadulong sa talatapan ni Gov. Castro agud iya maaprubahan, samtang kun wala naman ang gobernador, mahimo magpadulong sa talatapan ni Provincial administrator Atty. Ike Biñas.
Luyag sini ipalab-ot sa mga nagpangayo sang financial assistance nga padayon sila nga nagatinguha agud mahatag ang bulig gilayon, maghulat sang gamay nga tion bangud ginatun-an pa nila ang proseso dugang pa nga amu palang nagpungko ang mga bag-o nga personnel rason sa pagkaatrasar sang distribusyon sang kuwarta.
