Nagapati ang isa ka public health expert nga kinahanglan ang pagbinuligay sang nagkalain-lain nga ahensya sang gobyerno agud masolbar ang problema sa drug addiction.
Sa interview sang Bombo Radyo kay Ma. Cristina R. Senosa, RN, Provincial Health Office Representative, iya ginpahayag nga pinaagi sa kolaborasyon sang Local Government Unit (LGU), Local Chief Executive (LCE), kag mga ahensya nga nagaserbisyo sa public health kag public safety, mapabaskog ang community-based intervention, monitoring, counselling, referral, kag rehabilitation support para sa mga apektado nga indibidwal.
Suno kay Senosa, daku ang papel sang health sector sa pag-atipan sang mga nalulong sa iligal nga druga paagi sa medical assessment, counselling, mental health support, kag paghatag sang nagakaigo nga treatment ukon rehabilitation program agud mabuligan sila nga maka-recover kag makabalik sa normal nga pagpangabuhi.
Nagapanawagan man ini sa publiko nga magkooperar agud mas mapabaskog ang kampanya batok sa drug abuse kag matapna ang possible nga paglapta sang iligal nga druga sa kominidad.
