Nagpaandam ang isa ka public health expert sa publiko batok sa posible nga peligro nga dulot sang sobrang taas nga heat index sa lawas sang tawo.
Sa interview sang Bombo Radyo kay Dr. Philip Ian Padilla, Professor of Microbiology and Public health sang UP Visayas, ita ginpahayag nga dapat mapabilin sa 37 degrees Celsius ang normal nga temperatura sang lawas sang tawo bangud kun magsaka ini, maapektuhan ang husto nga pag-function sang nagkalain-lain nga organs sang lawas.
Suno kay Padilla, possible man nga maapektuhan ang utok nga mahimo magresulta sa problema sa pagpanghuna-huna kag pagdesisyon sang isa ka tawo.
Dugang pa sini, posible man nga ma-trigger ukon maglala ang iban pa nga mga balatian nga yara na sa lawas sang isa ka indibidwal tungod sa mataas nga heat index.
Pahayag pa niya, masami nga mabatyagan kun tuman ang kainit panahon amo ang heat exhaustion kag heat stroke nga kon indi maagapan mahimo magresulta sa pagkalipong, comatose condition, kag posible nga kamatayon.
Bangud sini, ginapahanumdom niya ang publiko nga mag-inom sang sapat nga tubig ukon indi magnubo sa walo ka baso kada adlaw agud mapabilin nga hydrated ang lawas, magsuksok sang presko kag komportable nga bayo kag magkaon sang masustansya nga pagkaon.
Ginahingyo man sang natungdan ang tanan nga magpabilin sa sulod sang balay kag likawan ang paggwa kon indi man kinahanglan agud malikawan ang epekto sang tuman nga kainit sang panahon.
