ROXAS CITY – Magapatawag sang public hearing ang Sangguniang Panlalawigan agud talakayon ang ginaproponer nga “Comprehensive Aerodrome Safety ordinance of Roxas City Airport” ilabi na sa mga mangin sakop ukon maapektuhan nga lugar.
Sa interview sang Bombo Radyo kay board member Aldwin Cruz-am, chairman sang committee on transportation, ginpahayag sini nga ini nga ginaproponer nga ordinansa ang bangud sa hinyo nga kooperasyon sang CAAP-Roxas nagikan sa lokal nga gobyerno, nga mabuligan sila sa pagproteher sa aerodrome sa syudad, nga nakasandig sa gintukod nga Republic Act 9497 ukon Civil Aviation Authority of the Philippines Act sang 2018.
Nasaad sa proposed ordinance nga sa sulod sang 8 kilometer radius halin sa tunga sang Roxas City airport, indi makahupot sang salampati ukon makapalupad sang burador ang mga residente.
Bangud sini, posible nga maapektuhan ang 38 ka mga barangay sang Roxas City kag 26 ka mga kabarangayan naman sa banwa sang Panay.
May penalidad man nga indi magsobra sa P5,000 sa magalapas sa tion nga mapapasar ini nga ordinansa.
Ini man ang rason sa igapatawag nga public hearing sa mga masunod nga semana, nga paga-imbitahan ang apektado nga mga barangays.
