Ginkumpirmar ni Agriculture Assistant Secretary Arnel de Mesa nga gina-istoryahan na sa masunod nga bulan ang pagbaligya sang P20 kada kilo sang bugas sa mga manunudlo sa pampubliko nga eskwelahan.
Kabahin ini sang pagpasangkad sang programa nga “Benteng Bigas Meron (BBM) Na” nga una ginlunsar para sa mga senior citizens, PWDs, solo parents, kag 4Ps beneficiaries.
Luyag sang Department of Agriculture nga ilakip ang mga manunudlo bilang bag-o nga benepisyaryo sang sini nga programa agud makabulig sa ila adlaw-adlaw nga gasto.
Sa subong, ginabulubanta nga 120,000 ka mga minimum wage earners ang nakabenepisyo sa sini nga programa humalin sang Hunyo.
Suno kay De Mesa, posible nga ma-access sang mga manunudlo ang P20 nga bugas sa mga pinili nga lugar sa rehiyon 2 kag rehiyon 3 subong nga bulan sang Agosto.
Gina-finalize pa ang mekanismo para sa nagakaigo nga distribusyon kag paglikaw sa pagdoble sang mga benepisyaryo.
Nahibaluan nga ang nasambit nga proyekto ang isa sa mga promisa sa kampanya ni Presidente Ferdinand Marcos Jr.
