ROXAS CITY – Ginkumpirma ni Atty. Atlas Catalan, provincial information officer sang Capiz nga kasunod sa pagpaidalum sa General Community Quarantine sang probinsiya ang liwat pagpahanugot sa public transport nga maka-operate.
Ginpahayag ni Catalan nga epektibo subong nga adlaw mahimo na nga makabiyahe ang mga PUJ’s, PUV’s, tricycle, trisikad kag bus, apang kinahanglan nga pagasundon ang no mask no ride policy kag ipatuman sa gihapon ang social distancing .
Magapadayon man ang mga checkpoint sa border security patrol agud matsekyar kun nagasunod gid man sa pagsulundan nga napagkit sa Executive Order No. 16 ang mga drivers.
Suspendido man ang home quarantine pass sa mga naga-edad sang 21 tobtob 59-anyos.
Apang ang curfew sa mga senior citizen kag naga-edad sang 21-anyos panubo ang padayon nga ginapatuman.
Apang sa sitwasyon nga nagatrabaho pa ang senior citizen ukon duha lamang sila sa isa ka balay kag wala sila sang iban nga kaupod, mahimo nga mahatagan sang special quarantine pass ang mga senior citizen.
Kinahanglan lamang nila magkuha sa ila barangay kapitan sang special quarantine pass.
