Gin-engganyo sang Atin Ito Coalition ang publiko nga mag-upod sa pagsaulog sang ika-napulo nga anibersaryo sang kadalag-an sang Pilipinas sa Arbitral Tribunal sang 2016.
Ginhatagan pagtamod ni Rafaela David, Convenor sang nasambit nga Coalition nga importante nga indi pagkalimtan kag padayon nga dumdumon ang kadalag-an nga nalab-ot sang pungsod.
Bangod ginkilala sang United Nations Convention on the Law of the Sea ukon UNCLOS ang kinamatarung sang Pilipinas kon tuhoy sa ginabaisan nga teritoryo sang West Philippine Sea.
Gani, nagpanawagan ang isa sa mga lider sang mga mangingisda kag co-convenor sang grupo nga si Roberto ”Ka Dodoy” Ballon nga magbuylog sa mga aktibidad agud kontrahon ang pag-angkon sang China sa mga teritoryo sang Pilipinas.
Nagapati si Rafaela David nga ang pagtindog para sa teritoryo sang pungsod indi lamang katungdanan sang gobyerno ukon grupo, kundi dapat nga mag-intra kag mag-isa ang tanan.
Ang ‘whole of nation approach’ amo ang dapat matabo agud mapalab-ot sa mga dumuluong nga pungsod nga ang West Philippine Sea iya sang Pilipinas.
Ginpangabay sini nga ipakita sang pumuluyo ang suporta kag selebrasyon sang pungsod sa pagdaug sa Arbitral Tribunal, napulo ka tuig na ang nakaligad.
