Nagpagwa sang pahibalo ang Office of Civil Defense (OCD) kag mga local government sa publiko, labi na sa mga residente sang Metro Manila kag mga kalapit nga probinsya, nga maghalong bangud sa malain nga kalidad sang hangin nga tuga sang madamol nga haze ukon aso nga nagahalin sa mga sunog sa kagubatan sa Kalimantan, Indonesia.
Suno kay OCD Deputy Administrator Assistant Secretary Raffy Alejandro, ang madamol nga aso halin sa wildfires sa Indonesia nagsulod sa Pilipinas matapos ini anuron sang hangin pakadto sa rehiyon.
Bangud sini, may pila na man ka mga local government nga nagpagwa sang ila kaugalingon nga mga pahibalo.
Ginpanugyan ni Caloocan City Mayor Along Malapitan sa mga pumuluyo nga magsuksok sang face mask kun magguwa sa balay agud malikawan ang posible nga epekto sini sa ikaayong-lawas, matapos marekord ang malain nga kalidad sang hangin sa ila syudad kag sa bug-os nga Metro Manila.
Base sa report, narecord ang madamol nga haze nga nagpadulom sa skyline sang Metro Manila, nga klaro nga nakita halin sa Antipolo City, Rizal, sang alas-5:48 sang aga sini nga Martes, Setyembre 1.
Samtang, ginpahayag sang Department of Environment and Natural Resources–Environmental Management Bureau (DENR-EMB) nga padayon nila nga ginabantayan ang kalidad sang hangin sa mga apektado nga lugar, ilabi na sa National Capital Region (NCR), CALABARZON, kag MIMAROPA.
Sa subong, padayon ang pagmonitor kag pag-usisa sang mga awtoridad sa lebel sang polusyon kag kadamol sang aso agud mahibaluan kag mapangandaman ang posible nga epekto sini sa ikaayong-lawas sang publiko kag sa palibot.
