Ginpaandaman sang Department of Health (DOH) ang publiko nga maghalong batuk sa mga sakit nga may kanggtanan sa ‘Holiday Heart Syndrome,’ kasubong sang stroke, tuga sang nagahilapit nga pagsaulog sang Paskwa kag Bag-ong Tuig.
Suno kay Health Secretary Teodoro Herbosa, ang Holiday Heart Syndrome ang isa ka kondisyon nga tuga sang tuman nga pag-inom sang alak, stress, kakulangan sa pahuway kag pagkaon sang maalat ukon matambok nga pagkaon nga nagapataas sa presyon, nga mahimo magdangat sa arrhythmia ukon abnormal nga heart rhythm nga isa sa rason sang stroke.
Sa paglibot sang DOH, ginpakita sang Philippine Heart Center (PHC) nga naglab-ot sa mas ukon menos 60 ang kaso sang Stroke humalin Hulyo tubtob Nobyembre 2024 nga gintutukan sang ospital.
May nabalhag man nga pito ka kaso sang stroke antes pa man mag-Paskwa, ukon halin Disyembre 1 tubtob 20 sini nga tuig.
Posible pa nga magtaas ang numero pagkatapos sang Paskwa kag sa pagsug-alaw sang Bag-ong Tuig kun indi mapunggan ang tuman nga pag-inom sang alak kag pagkaon sa asud-asod nga handaan.
Ang 110 ka kaso naman sang Acute Coronary Heart Syndrome nga na-record sang PHC sadtong Disyembre 2023 ang nagtaas sa 115, pagsulod sang Enero 2024.
